जिल्ह्यात प्रवेशासाठी परवानगीचे अर्ज संकेत स्थळावर सादर करावेत - जिल्हादंडाधिकारी

जिल्ह्यात प्रवेशासाठी परवानगीचे अर्ज संकेत स्थळावर सादर करावेत - जिल्हादंडाधिकारी       

       

परभणी / सोनपेठ (दर्शन) :- 

लॉकडाऊनच्या कालावधीत विविध जिल्हयात अडकलेले कामगार,पर्यटक, भाविक, विद्यार्थी व इतर व्यक्तींना त्यांच्या स्वजिल्ह्यात पाठविण्याबाबत मार्गदर्शक सुचना केंद्र सरकार व राज्य सरकार यांच्याकडून

प्राप्त झालेल्या आहेत. त्याअनुषंगाने बाहेरील जिल्ह्यात अथवा राज्यात परभणी जिल्ह्यातील नागरिक अडकले असल्यास जिल्ह्यात प्रवेशासाठी परवानगीचे अर्ज https://covid19.mhpolice.in/ या संकेतस्थळावर ऑनलाईन सादर  करावेत. असे आवाहन जिल्हादंडाधिकारी दी.म. मुगळीकर यांनी केले आहे.

          अर्जदारांनी अर्जाची स्थिती संकेतस्थळावरच पाहावी. यासाठी जिल्हाधिकारी कार्यालयात चौकशीसाठी येऊ नये. मुंबई , पुणे , ठाणे , औरंगाबाद , सोलापूर आणि इतर “ रेड झोन " जिल्ह्यातील व्यक्तींना परभणी जिल्ह्यात प्रवेशाची परवानगी दिली जाणार नाही तसेच याबाबत संबंधित जिल्ह्याच्या जिल्हाधिकाऱ्यांना तसे कळविण्यात आलेले आहे. तरी रेड झोन जिल्ह्यातील व्यक्तींनी जिल्ह्यात अनाधिकृतपणे प्रवेश केल्याचे दिसून आल्यास गुन्हे दाखल करण्यात येतील व संबंधीतांना 14 दिवस संस्थात्मक विलगीकरण ( Institutional Quarantine ) करण्यात येईल. इतर जिल्ह्यात व राज्यात अडकलेल्या व्यक्तींसाठी परभणी येथून वाहन पाठवून घेऊन येण्यासाठी अर्ज सादर करण्यात येऊ नये तसे अर्ज आल्यास रद्द करण्यात येतील. परवानगी दिलेल्या इतर जिल्ह्यातून किंवा राज्यातून आल्यानंतर संबंधितांना 14 दिवस निवारागृहात ठेवण्यात येईल व त्यानंतर वैद्यकीय तपासणी झाल्यानंतरच घरी पाठविण्याचा निर्णय घेण्यात येणार आहे. जिल्ह्यातील लग्न सोहळे शक्यतो लॉकडाऊन नंतर आयोजित करण्यात यावेत. असे जिल्हादंडाधिकारी, परभणी यांनी कळविले आहे.

               -*-*-*-*-