इतर विषयांच्या गुणांच्या सरासरीद्वारे गुण शिक्षण मंडळाचा भूगोल विषयाबाबत निर्णय

इतर विषयांच्या गुणांच्या सरासरीद्वारे गुण

शिक्षण मंडळाचा भूगोल विषयाबाबत निर्णय

परभणी / सोनपेठ (दर्शन) :-

 

कोरोना विषाणुच्या प्रादुर्भावाच्या पार्श्‍वभूमीवर 23 मार्च रोजी सकाळी 11 ते 1 या वेळेत आयोजित केलेल्या इयत्ता दहावीच्या सामाजिक शास्त्र पेपर -2 (भूगोल) या विषयाची लेखी परिक्षा आणि त्यानंतर आयोजित करण्यात आलेल्या दिव्यांग विद्यार्थ्यांच्या कार्यशिक्षण या विषयाच्या परिक्षा राज्य माध्यमिक व उच्च माध्यमिक शिक्षण मंडळाद्वारे रद्द करण्यात आल्या होत्या. त्या पार्श्‍वभूमीवर आता परिक्षा रद्द केलेल्या विषयांना गुणदान देण्यासंदर्भात मंडळाचे सचिव डॉ. अशोक भोसले यांनी बुधवारी (दि.27) एक प्रगटन जाहीर करीत सामाजिक शास्त्रे पेपर - 2 (भूगोल) या विषयाचे गुणदान हे उमेदवाराने दिलेल्या अन्य विषयांच्या लेखी परिक्षेस प्राप्त केलेल्या गुणांची सरासरी विचारात घेवून त्याचे रुपांतर परिक्षा रद्द केलेल्या भूगोल विषयाच्या परिक्षेसाठी निर्धारीत केलेल्या गुणांद्वारे करावे, असे म्हटले आहे. दिव्यांग विद्यार्थ्यांच्या कार्यशिक्षण या विषयाचे गुणदान आणि अन्य विषयांच्या लेखी/तोंडी/प्रात्यक्षिक/ अंतर्गत मूल्यमापन / तत्सम परिक्षेत प्राप्त केलेल्या गुणांची सरासरी विचारात घेवून त्याचे रुपांतर परिक्षा रद्द केलेल्या कार्यशिक्षण विषयांच्या परिक्षांसाठी निर्धारीत केलेल्या गुणांमध्ये करण्यात येईल, असे म्हटले आहे. सदर विषयांच्या परिक्षांसाठी गुणदान करुन निकाल जाहीर केला जाईल, असेही सचिवांनी या प्रगटनाद्वारे म्हटले आहे.