व्यसन मुक्त गाव ; तंटामुक्त गांव समिती तंटे सोडवण्याबरोबरच, अवैध व्यवसायांच्या निर्मूलनासाठी पोलीसांना मदत करतील
पोलीस उप महानिरीक्षक शहाजी उमाप यांची संकल्पना
परभणी/सोनपेठ (दर्शन) :-
नांदेड परिक्षेत्रात पोलीस उप महानिरीक्षक शहाजी उमाप यांच्या संकल्पनेतून ‘व्यसनमुक्त गाव मोहीम’ राबविण्यात येणार आहे. या मोहिमेच्या माध्यमातून गावातील तरुणांना व्यसनांच्या विळख्यातून वाचविण्याचा उद्देश आहे. या योजनेत चार जिल्हे –नांदेड, लातूर, परभणी आणि हिंगोलीतील ग्रामपंचायतींमध्ये २ ऑक्टोबर रोजी ग्रामसभा घेऊन तंटामुक्त गांव समिती गठीत केली जाणार आहे.
या समित्या गावांतील तंटे सोडवण्याबरोबरच, अवैध व्यवसायांच्या निर्मूलनासाठी पोलीसांना मदत करतील. या मोहिमेच्या अंतर्गत, गावात २५ ते ५० होतकरू तरुणांचा समावेश असलेल्या ग्रामरक्षक दल तयार केले जाणार आहे, ज्यामुळे व्यसनमुक्ती आणि अवैध व्यवसायांवर नियंत्रण ठेवण्यास मदत होईल. महिलांसाठीही ‘दुर्गा व्यसनमुक्त गांव समिती’ स्थापन करण्यात येईल, ज्याद्वारे गावातील महिलांचा सहभाग वाढेल.
पोलीस अधीक्षकांच्या नेतृत्वाखाली विशेष पथके गठीत करून अवैध व्यवसायांवर धाड सत्रांचे आयोजन सुरू करण्यात येणार आहे. नागरिकांनी निर्भीडपणे अवैध व्यवसायांची माहिती पोलिसांना द्यावी, असे आवाहन उप महानिरीक्षक शहाजी उमाप यांनी केले आहे.
No comments:
Post a Comment